Mawni mum Hammadi, rokkiino Hammadi puccel njamndi. Ngel alaano nanngirɗe.

Puccel njamndi ngel naywii.

So omo ɓennatnoo yimɓe, yahratnooɓe koyɗe wolla joom puccoñ njamndi ngoɗkoñ, o alaano feere ngam humpitde ɓe omo ɓenna.

Nde o arnoo e laawol mawngol ngol sifaaji ina ɗoon, ƴeew eɗi kolla yimɓe ina poti daraade seeɗa, ndaara so otooji ngarataa.

Fereŋ alaano e puccel makko njamndi ngel.

O roŋki daraade ngam ƴeewde so alaa ko arata, oon sahaa noon o yaawnii naatde e laawol mawngol ngol.

Mawniiko ina anndunoo ɗum moƴƴaani e makko, ɓamde donngal mawngal, kono kadi omo anndunoo ina wela Hammadi e dognude puccel njamndi ngel. Mawniiko oo yahiino ƴeewoyde golle to gure mawɗe too.

Ñande wootere Hammadi dogni puccel mum njamndi e laawol mawngol.

Engol fortinoo. Haayre fof alaano e maggol.

Hammadi miijii e nder woŋki mum, wi’ ngol laawol no ngol moƴƴiri nii, miin ko ɗoo ndognatmi hannde puccel am njamndi ngel.

Fereŋ alaano e maggel.

No o yahrii nii e njaawirka, o roŋki dartaade ko adii nde o yottotoo e laawol mawngol gonɗgol ngool taccatnongol ngol o rewi ngol, oto wooto ina aratnoo.

Joom oto oo kañum waawi dartaade woto feraade Hammadi.

O gaañaaki haŋkadi, nde wonnoo oto oo ina moƴƴi fereŋ. Hay fof e wa’de noon Hammadi heɓaani hakkille. O miijii e nder geɗe makko, o wi’ miin mi wondaaka fereŋ.

Miin miɗo waawi yi’de geɗe laawol ngol kala. So oto ina ara caggal am, maa mi yi’ ngo. So tawii miɗo e laawol maa o daro. O jaɓataa gaañde kam.

Maandeeji ngonɗi e laawol ɗii, maa a yi’ won heen bi’ɗi yahru junngo nano, won bi’ooji darto, won kadi bi’ooji yahru baŋŋe ñaamo.

Kono Hammadi no dogniratnoo puccel mum njamndi ngel alaa heen ko hakkille mum rokki ɗum yoo ƴeew, hakkille makko heddaaki e ɗum ɗoon fof.

O roŋki dognirde seeset, saka dartaade.

Ñande wootere, omo softinoyi ɓanndu makko, omo dogna puccel makko njamndi no feewi.

Cukalel ina yaltunoo engel taccita laawol mawngol ngol, kono noon Hammadi roŋkii dognirde seeset, o tinnitii o rewni puccel ngel sara kono hay ɗuum o roŋki waɗde.

O feroyii cukalel ngel, ngel yani.

Cukalel ngel hoore mum yani e laawol ngol, ngel gaañii no feewi.

Ko Adii nde ɓe njottinta ngel suudu safrirdu nduu, ngel maayi.

Gardeeji ngari wiɗtude. Ɓe nawori puccel njamndi ngel. Ɓe mbi’ Hammadi ne waawaa accude dognude puccel njamndi ngel.

Kono kadi omo haani faweede kuugal.

Baaba makko yaltinii kaalis keewɗo,sabaabunde maayde cukalel .

Ɗee ɗoo geɗe ina miijcina en, ko heewi, eɗen mbaɗa geɗe keewɗe ɗe njahdaani e laawol, ko ina wayno en ngalaa fereŋaaji.

So tawii eɗen njannga haala Alla, ɗuum ina holla en no njahreten. Sabu o wi’ enen fof ko en waɗooɓe ko boni.

Hammadi e hoore mum no daɗiri maayde, so tawii oto oo ferinooma ɗum. O haannoo ko halkaade, ko heddii e dogdu mum e mbedda mawka kaa.

Kono o reentaaki e haala kaa.

En tiiɗnotaako, ndeento ɗen, mbeeɓnen ko’e men seeɗa. Njiɗɗen tan waɗde ko sago ko’e men, kono ɗuum e wa’de noon fof ɓerɗe men laaɓaani.

Njiɗɗen yahrude e laawol ko no mbedda, no haala Alla kaa wi’ri nih.

Ka wi’ laawol naatnowol en halkaare dame maggol ina njaaji, naatooɓe heen ɓee ina keewi.

Alla e hoore mum rokkii en sifaa e laabi ɗi o waɗi ɗii, o waɗaanii en sikkitaare.

Miijcoɗen kaa ɗoo haala, keɓen hakkille.

Iisaa wi’i, “So on mbaajtaaki koye mon, onon fof ko noon kalkorto ɗon.” (Linnjiila feccere Luka13:3)

Alla ina soɓna. O wi’, “So tawii neɗɗo bakkodinii, o maayat.” (Annabi Esekiyel 18:20)

So tawii eɗen keɗtoo haala, maa en ndeento laabi goɗɗi.

“Kono so en mbaajtiima ko'e men, ma o yaafo en, o laɓɓina en e kala tuundi, ngati kaŋko Alla ko o aadiyaŋke, ko o peewɗo.” (Linnjiila Iisaa Yuhanna gadano 1:9)