- Bone Ficcat
- Laaci
Ko miijo Haadii Maaliki Sih K.K.K.J.K. Nande 16,17 Juuldaandu, ine hawri e 24/11/2003 c.j. Iisaa y.k.w. e makko. (72) do e Bamako, Laamorgo dowla (Mali)
Ine waɗa yoga e gure, e galleeji.
Ine ndenndina won e daabaaji ɗi njiydaa marngooji.
- Meeɗi waɗde sahaa waɗi saanga e yontaaji.
- Puucu ndimaangu kañum e ngaari cowoori.
- Wondude e rawaandu, njawdi kam e ngori fanna geeji.
Ɗi mbaɗdaa e galle gooto e weleede joom majji.
Ñande wootere ɗi njiyi, mbatiije ine kaɓa dow tataaji.
Rawaandu wi puccu ndimaangu taƴ ɗii ngadaaji.
“Ceerndoyaa ɓeyo haɓooɓe; Bone dee ficcat laaci.“
Puucu moornii fetti ndu, ndu saamoyi e tataaji.
Ndu immi ndu darii ndu ñiɓi cegeneeji.
Ndu fiɗɗii ndu hucci to ngaari cowoori.
Ndu yettii ndu wi ngaari, seerndoy, «Bone ficcat laaci.»
Ngaari wiy, “So a immanaaki, mi ɗoon mi waagete tekteki.”
Rawaandu heɓoy too soppinii, ine sakki laaci.
Ɓooyaani kadi ndu hucci to njawdi ne’eeri.
Ndu wiy, “Aan ne, ko mbiyaa e ɗii mbatiiji?”.
Ndi wiy ndu, «Anndi ko a naafige ceŋaaɗo cegeneeji.»
«Holi miin holi seerndoyde ɗii ɗoo mbatiiji?»
Ndu hersi ndu turii hoore aandu ŋaacca leydi.
Nde ndu turtii, ndu wiy miin mi seerataa e wasiyaaji
Ndu yaaɓani ngori ndu yettii ndu dicci koppi.
Ndu wiy ngori, «Ko aan tan heddi seerdoy ɗiya mbatiiji.»
Ngori wiy ndu, “Aandi aan ko a mujji coofoowo coɓɓoƴƴi.”
«Holi ko duñ maa e waajuuji; ko a ñaamoowo jiibaaji.»
Rawaandu deƴƴi, deeƴi jokki e haajuuji.
Ndeke noon ko goonga, BONE FICCAT LAACI.
Mbatiiji ndewi haɓde haa ngiwi dow tataaji.
Ɗi naati ɗoon e suudu wootooru huɗo e baaji.
Ɗi tawi toon debbo mawɗo kortiiɗo e les fabiyoŋaaji.
Oon sahaa ko dabbunde; yimɓe ne kuɓɓa nder cuuɗi.
Kadi oon mawɗo ko mottatnooɗo falla e gaaraaji.
Mbatiiji ndewi haɓde haa cari toon jeynge e jigeeji.
Jigeeji kuɓɓi haa naŋngi huɗo e baaji.
Mawɗo roŋki yaltude wontani ɗum ko ɗojjooji.
Nde yimɓe ngarata tawi mawɗo huɓɓii haa hooñii.
Hanti alaa ko heddii so wanaa asgol gabriiji.
Kono hade ndeen ngulloyo ɗen gure saraaji.
Daraaki ɓe ngitti puccu nguu e ngadaaji.
Ɓe ngulloyii gure takkiiɗe ɓe e kala baŋngeeji.
Ndeen ɓe ngarti wulloyaade ɓe kaɓɓiti nukkureeji.
Tan puccu filti saami yanti e jiibaaji.
Ɓe ndaasi ngu, ɓe mbeddoyii ngu gaɗa wurooji.
Rawaandu dogi arde ine willa laaci.
Haa jiimi e puccu, wiy, «Bone ficci laaci.»
Mawɗo lootaa hasnaa wirnoyaa e aadaaji.
Nde ɓe ngarti ɓe tawi hoɓɓe ngiwii e kala saraaji.
Ko yaawi leelaani ngaari haɓɓaa haa ɓiici.
Hirsaa soppaa feccaa e barmeeji.
Bottaaje ndefaa yimɓe ñaami mbaɗi duwawuuji.
Rawaandu wiy ngaari, “(Bone) ficci laaci.”
Jaŋngo e mum woɗɓe ngari, ɓeen ko koreeji.
Ɓe nanngi njawdi, ɓe kirsi, ɓe mbaɗi saadaaji.
Jaleeɗe lamtii e oon galle ñande mun boyji.
Rawaandu sewni njawdi wiy, “(Bone) ficcii laaci.”
Ñalngu arti banndum ngori, naŋngaa seerndaa e ɓorooji.
Yantude e jawɗi goɗɗi, maa mbiyen dammuccii.
Fof kirsaa, ñande mun ko silkiiji.
Rawaandu ari wiy ngori, «Bone ficci laaci.»
Ko goonga kay jaka, “Bone ficcat laaci.”
Ƴeewee ndii ngariiri, e ɗii ɗoo daabaaji.
Ɗi kaɓinooma rawaandu e ɗii wasiyaaji.
Kono ɗi ngontanii yimɓe hoore haajuuji.
Ɗum ɗoo dee ko tinndol hakkilanteeɓe ndurnee miijooji.
So en ƴeewtindiima hannde ɗii ɗoo hareeji.
Leñam leñamaagu mbonngu e nguutuuji.
Gonɗi hakkunde hoɗɗuɓe gese, keedi galleeji.
Ɗi ngaddii jinndere ɗi naatnii sariyaaji.
Faaɗeende waɗanii en e ɓillaare ladeeji.
Mi siftii ndokkee kam wuro, mi firtana on e sifaaji.
Ko Fulɓe mbaɗi alaa ko Seɓɓe mbaɗi, ɗum fof dee, ko
ayibaaji.
Kawren tan ko Alla hoɗɗini en, en ngalaa hen sagooji.